Mae yna amrywiaeth eang o ddefnyddiau crai ym Mhowys y gellid eu hailgylchu/eu hailddefnyddio i gynhyrchu ynni a thrwy hynny cwtogi ar wastraff sy'n cael ei anfon i safle tirlenwi neu sy'n cael ei adael i bydru. Nod prosiectau Ynni a Gwastraff yw ychwanegu gwerth at y gwastraff a gynhyrchir ym Mhowys a datblygu ffyrdd y gellir defnyddio ynni adnewyddadwy mewn amgylchedd gwledig.

Trwy weithio mewn partneriaeth â busnesau a sefydliadau perthnasol, ein nod yw ychwanegu gwerth at gynhyrchion gwastraff trwy gynnig cymorth ag ymchwilio, datblygu cynnyrch, marchnata a sicrhau cyhoeddusrwydd.

Mae Glasu hefyd yn gweithredu fel hwylusydd, trwy gynnal cyfarfodydd i ddwyn ynghyd unigolion sydd â diddordeb i drafod datblygu syniadau.

Dyma enghreifftiau o brosiectau sydd ar y gweill ar hyn o bryd:

• Tanwydd Pren ym Mhowys - wedi'i gynllunio i ddynodi, hybu a manteisio i'r eithaf ar gyfleoedd ar gyfer datblygu'r sector ynni pren cynaliadwy ym Mhowys. Prif nod y prosiect fydd gwella ansawdd tanwydd pren adnewyddadwy ym Mhowys ar ffurf boncyffion, sglodion a pheledi, a sicrhau eu bod ar gael yn haws a'u bod yn fwy cystadleuol.

• Tanwydd Trafnidiaeth Adnewyddadwy - datblygu dull gwerin gwlad o gyflenwi rhywfaint o danwydd trafnidiaeth adnewyddadwy i'r Sir.

• Rheoli Gwastraff yn Arloesol - dod o hyd i ffyrdd arloesol o fynd i'r afael â gwastraff masnachol (nad yw targedau'r Awdurdod Lleol neu dargedau ailgylchu cenedlaethol yn berthnasol iddo), trwy ddod o hyd i lwybrau newydd ar gyfer ailgylchu a chreu cynhyrchion newydd a marchnadoedd newydd. Rhagwelir y bydd cymunedau'n chwarae rhan mewn creu cyn lleied o wastraff â phosib.

• Cyrchu Arloesedd - galluogi Glasu i barhau i ychwanegu gwerth mewn modd arloesol a chynaliadwy. Bydd y gefnogaeth yma'n annog syniadau newydd i ddod i'r fei ac yn annog cyflawni prosiectau penodol nad yw'r tair rhaglen sy'n bodoli yn eu cwmpasu.